தலைமையுரை ஆற்ற வந்த அறிவியலாளரும் கவிஞருமான ய.சு.ராஜன் (தாகூரை நினைவுபடுத்தும் தீர்க்கமான முகம்) வடக்கு வாசலை மூன்று வருடங்களாக தொடர்ந்து வெற்றிகரமாக (பொருளாதார ரீதியில் அல்ல) நடத்தி வருவதற்கு ஆசிரியரின்  மனைவியே முக்கியமான காரணம் எனக்கூறி அவரை மேடைக்கு அழைத்து பார்வையாளர்களுக்கு அறிமுகப்படுத்தினர்.
 
வடக்கு வாசல் இணையதளத்தை தொடங்கி வைத்த கலாம் அதன் இலக்கிய மலரை வெளியிட ய.சு.ராஜன் பெற்றுக் கொண்டார்.  இலக்கிய மலரில் இந்திரா பார்த்தசாரதி மற்றும் கி.ராஜநாராயணன் உட்பட பலர் சிறுகதைகள், கட்டுரைகள் எழுதியிருந்தனர்.  எழுதுவதை அநேகமாக நிறுத்தி விட்ட இந்திரா பார்த்தசாரதி வடக்கு வாசலுக்காகவே மீண்டும் எழுதியிருக்கிறார் என்று நினைக்கிறேன். 

டாக்டர் அப்தல் கலாம்  வடக்கு வாசல் இதழில் வெளியான தனக்கு பிடித்த கவிதைகள் இரண்டை குறிப்பிட்டார்.  திருக்குறள் மற்றும் கம்பராமாயணத்திலிருந்து மேற்கொள்கைகளை காட்டி பேசிய அவரது பேச்சிற்கு பல இடங்களில் பலத்த கைத்தட்டல்கள்.  நல்ல பத்திரிகை ஒன்றை நடத்தி வரும் கே.பென்னேஸ்வரனை ஆதரிக்கும் விதமாக நீங்கள் அனைவரும் வடக்கு வாசல் பத்திரிகையை வாங்க வேண்டும் என்ற அன்பு வேண்டுகோளை விடுத்தார்.    தனது பேச்சின் இறுதியில் தேசத்தின்

முன்னேற்றத்திற்காக பார்வையாளர்கள் அனைவரையும் பிரார்த்தனை செய்யச் சொன்னர்.  பிரார்த்தனையை அவர் ஒவ்வொரு வரியாக கூற பார்வையாளர்கள் உற்சாகத்துடன் திரும்பக் கூறினர்.  நிகழ்ச்சி முழுவதையும் தனது வெண்கலக் குரலால் அற்புதமாக தொகுத்து வழங்கினர் திரு.ஜான் சுந்தர்.
 
தனது எல்லா விழாக்களிலும் செய்வதைப் போல இதிலும் விழா சம்பந்தப்பட்ட அனைவரையும் கெரவித்தார் பென்னேஸ்வரன்.
 
க.திருநாவுக்கரசு